അടിമകൾ! അടിമകൾ! അഭിനവ-അടിമകൾ!
ഇവരടിമത്തത്തിന്നഴിയാ തുടലിൽ
ഊതിക്കാച്ചി വിളക്കിച്ചേർത്തോരടുത്ത കണ്ണികൾ.
സംസ്കാരത്തിൻ നായകരെന്നൊരു
മേനി നടിക്കും ഊഷരവർഗ്ഗം.
ഒരു വാഴ്ത്തൽ പത്രവും ചത്തു മലർന്നാലാ-
കാശത്തേക്കൊരുനിര വെടിയും-
സ്വപ്നം കണ്ടൊരു നായകണക്കവർ
നക്കിത്തിരിയും ഉടമക്കീഴിൽ.
ഉടയോർതൻ പിണിയാളുകളാകും
സർക്കാരിൻ ചില ജനസേവക്കാർ.
സംഘം ചേർന്നൊരു കൊടിയും പേറി
അലയുന്നോരാ കഴുകന്മാർ!
കൈക്കൂലിക്ക് കരം നീട്ടീടും
ഇല്ലേലൂതിയണയ്ക്കും ജന-സ്വപ്നങ്ങൾ.
തൂലിക പടവാളാക്കിയ വർഗ്ഗമി-
താർക്കോ വേണ്ടി ചിലച്ചീടുന്നു.
വാഴ്ത്തലുപാട്ടുകൾ പാടീടുന്നവർ
വേണ്ടതു വായിൽ വിഴുങ്ങീടും.
കാഴ്ചക്കാരോ കണ്ടുമടുത്തു
ഈ കൂലിയെഴുത്തിൻ പേക്കൂത്ത്.
അടിമകൾ! അടിമകൾ! അഭിനവ-അടിമകൾ!
ഇവരടിമത്തത്തിന്നഴിയാ തുടലിൽ
ഊതിക്കാച്ചി വിളക്കിച്ചേർത്തോരടുത്ത കണ്ണികൾ.
No comments:
Post a Comment